Same, 24 Fevereiru 2026

Exelénsia Prezidenti Autoridade Munisipál Manufahi, Luis Marçal da Costa Tavares akompaña husi Visi Prezidenti IPTL, Diretór Agrikultura, Diretór SEFOPE, Xéfi Gabineti Apoiu Tékniku no Reprezentante Diretora Edukasaun, simu vizita kortezia Sua Exelénsia Embaixadór Timor-Leste nian ba Vietnam, Sr. João Pereira iha Autoridade Munisipál Manufahi.

S.E. Embaixadór apresia tebes ba Prezidenti Autoridade Munisipál ho ekipa, tanba bele lori Munisípiu Manufahi tama iha Avaliasaun kondisaun Mínima ho Valór “Muito Bom”, ne’e opurtunidade atu hadia no hametin liu tan kooperasaun servisu hodi hakat ba podér lokál. Opurtunidade Munisípiu nian atu kria kooperasaun servisu ho Vietnam barak tebes, importante mak Autoridade iha prontidaun atu kria akordu servisu direta ka liu-husi Jestór Nível Altu Ministériu Administrasaun Estatál, Ministériu edukasaun, SEFOPE nian. No ba ensinu Superior sira hanesan Institutu Poli Tékniku Timor-Leste iha autonomu rasik hodi halo kooperasaun direta ho universidade sira iha Vietnam ka liu-husi Ministériu Ensinu Superior. Hau mai hato’o informasaun iha ne’e, bazeia mós ba pedidu husi kompañia ka instituisaun Vietnam balu ne’ebé mak hakarak tebes kria kooperasaun servisu. Vietnam, nia kondisaun rai, jeográfikamente hanesan mós kondisaun rai iha parte kosta-súl nian hanesan Betano hodi ba tó Natarbora.

Prezidenti Autoridade hato’o agradese wa’in ba S.E. Embaixadór, bele mai vizita Autoridade Munisipál hodi fahe informasaun kona-bá; Posibilidade kooperasaun bilateral entre Timor-Leste no Vietnam, liu-liu kooperasaun servisu entre Munisípiu Manufahi ho Vietnam iha área Agrikultura, Edukasaun, Traballadór nian, nomós fahe informasaun kona-bá Sistema Governasaun Vietnam nian no seluk tan. Autoridade Munisípiu, iha parte agrikultura halo ona investimentu kikuan iha We-Inan Dotic-Alas. No atu hadia diak liu tan ba oin, Autoridade mós presiza hetan esperiénsia servisu agrikultura nian husi Vietnam. Karik iha opurtunidade iha tempu oin mai, Autoridade ho ekipa Munisipál bele ba hare direta jestaun servisu agrikultór sira no intervesaun Guvernu nian iha parte agrikultura nian.

Portantu, iha informasaun barak mak Autoridade Munisipál hato’o ba S.E. Embaixadór ligadu ho servisu agrikultura, Edukasaun, SEFOPE no Institutu Poli Tékniku Timor-Leste nian. No S.E. Embaixadór sei kontinua hato’o informasaun ne’ebé hetan ba Nasionál, liu-liu Ministériu Administrasaun Estatál, Ministériu edukasaun no SEFOPE.

“Mídia PAMM”