Exelénsia Presidente Autoridade Munisipal Manufahi, 𝐋𝐮𝐢𝐬 𝐌𝐚𝐫𝐜̧𝐚𝐥 𝐝𝐚 𝐂𝐨𝐬𝐭𝐚 𝐓𝐚𝐯𝐚𝐫𝐞𝐬, hamutuk ho Diretór SMASA, Xefi Suku Rotutu, Grotu, Betano no Xefi Aldeia sira Partisipa iha Seremonia Lansamentu Projetu Kiwa Preserve no Seremonia ne’e halao iha Novu Turismu Bidau Lisidere Dili.

PRESERVE Pacific Resilience through Secure livelihoods, Ecosystem and Resource management, valued culture and Equity mak projetu reziliénsia klimátika rejionál ida ne’ebé sei implementa iha Timor-Leste, Papua Nova Guiné no Samoa, husi Maiu 2026 to’o Setembru 2029. WaterAid Australia lidera projetu ne’e iha parseria ho Live & Learn no Permatil Global, ho apoiu hosi Inisiativa Kiwa. Projetu ne’e uza solusaun bazeia ba natureza atu proteje ekosistema, haburas seguransa bee no ai-han, no hametin moris-dignu komunidade sira.

Iha Seremonia Lansamentu ne’e iha Diskursu Exelénsia Presidente Autoridade Munisipal Sublina katak: “Iha Timor-Leste, projetu ne’e sei servisu hamutuk ho komunidade iha area mota Karau ulun. inklui Suku Daisua, Rotuto, Grotu no Betano. Ida ne’e importante tebes, tanba bee ne’ebé tun husi foho sempre liu husi Suku sira ne’ebe pertense ba mota boot sira iha Manufahi. Bee hirak ne’e sei sirkula ba natar no tasi. Tanba ne’e, problema no solusaun hirak ne’ebe sei ofrese tenke halo mos ligasaun ho Populasaun sira ne’ebe hela iha parte foho to’o iha rai tetuk.

Hau nota katak projetu ida ne’e sei promove regra tradisionál sira hanesan tara bandu hodi halo reflorestasaun ba mota-ninin, protesaun ba bee matan sira, infraestrutura bio-infiltrasaun, kontrolu erozaun, prátika agroekolójika no projetu ida ne’e mos asegura partisipasaun ema hotu liliu feto, juventude no ema ho defisiénsia.

Hau hakrak sita uitoan kona ba risku no potensialidade territorial iha Munisipiu Manufahi. Autoridade Munisipiu Manufahi iha koordenasaun diak ho MPIE ba elaborasaun PMOT iha Munisipiu Manufahi. Dadus diagnóstiku PMOT hatudu katak Manufahi nia área foho iha ligasaun forte ho area kostál iha sul. Área foho nian iha potensialidade atu produs kafé, kami, ai-fuan no hortikultura, iha sorin seluk iha área kostál iha Betano no Alas, no zona Caraulun no Sahen, iha potensialidade boot ba natar, batar, modo, peska no produsaun alimentar sira ne’ebe orientadu ba merkadu.

Iha sorin seluk mos Exelénsia Presidente Autoridade Munisipal Hodi Povu Manufahi nia Naran hato’o agradese ba Inisiativa Kiwa no parseiru finansiamentu ne’ebé apoia esforsu rejionál ida-ne’e, inklui Uniaun Europeia, França liuhosi AFD, Kanada, Austrália no Nova Zelandia. Dezenvolvimentu iha Munisipiu Manufahi la mai husi instituisaun ida de’it. Ita hato’o agradese ba WaterAid nia apoiu kleur iha Timor-Leste no Manufahi, inklui programa HALIRAS BESI, neʼebé servisu ho Autoridade Munisipál, BTL, PARTISIPA, grupu maneja fasilidade bee no sosiedade sivil atu hametin BESI inkluzivu no reziliente. Ita mós rekoñese RAEBIA, Luta ba Futuru no JICA-GCF ba apoiu iha Suku Aitemua, Turiscai, atu dezenvolve regulamentu suku, mapa utilizasaun rai futuru no Tara Bandu atu proteje floresta, biodiversidade no rekursu naturál. Prosesu konsultasaun komunidade ida-ne’e fó ezemplu di’ak kona-ba lei tradisionál, planeamentu no siénsia bele servisu hamutuk. Ita agradese ba Governu no povu Japaun no organizasaun DEKAPRO ba apoiu istóriku ba kanál irigasaun iha Uma Berloic, Alas; no rekoñese JICA nia kontribuisaun ba planeamentu mestre agrikultura no dezenvolvimentu irigasaun iha nivel nasionál.

Seremonia ne’e Marka Prezensa husi Sua Excelensia Segundu Vice Primeiru Ministru RDTL Reprezenta husi Exelénsia Vise-Ministru ba Operasionalizasaun Ospitál Dr. Flávio Brandão Mendes de Araújo, Sua Exelénsia Membru Governu, Reprezentante Ministeriu no ajénsia nasionál sira Sua Exelénsia Embaixadór Timor-Leste ba Asuntu Klimátiku, Reprezentante Inisiativa Kiwa no parseiru finansiamentu, Reprezentante WaterAid Australia no WaterAid Timor-Leste, Live & Learn, no Permatil Global, Reprezentante parseiru dezenvolvimentu no organizasaun sosiedade sivíl sira.

“ℳℯ𝒹𝒾𝒶 𝒫𝒜ℳ”