𝐒𝐚𝐦𝐞, 𝟐𝟎 𝐅𝐞𝐯𝐞𝐫𝐞𝐢𝐫𝐮 𝟐𝟎𝟐𝟔

Autoridade Munisipal Manufahi konvoka Sorumutu ho Kompañia Fornesedór ai-hán ba Merenda Eskolár iha Salaun Kablaki, ho ninia objetivu hodi ko’alia no klarifika ba malu sobre informasaun sira liga ho fornesimentu ai-hán ba programa merenda eskolár nian iha terrenu.

Prezidenti Autoridade Munisipál, 𝐋𝐮𝐢𝐬 𝐌𝐚𝐫𝐜̧𝐚𝐥 𝐝𝐚 𝐂𝐨𝐬𝐭𝐚 𝐓𝐚𝐯𝐚𝐫𝐞𝐬 hatete; “Kompaña Lokál parseiru Governu nian no Autoridade Munisipál mak konvida ita bo’ot sira hola parte hodi ejukuta no fornese ai-han ba eskola sira. Programa merenda eskolár la hanesan ho projetu fíziku sira.

Merenda eskolár ne’e, kada alunu/a konsumu 0,35 cents ba kada loron efetivu. Autoridade tau konfiansa ba ita bo’ot sira, husu atu jere halo didiak hodi hadia nutrisaun ba ita nia estudantes sira.

Iha trimestre dahuluk ita bo’ot sira sei investe no utiliza ita bo’ot sira osan rasik, wainhira governu aprova osan merenda eskolar nian, Governu sei devolve fali ita bo’ot sira nia osan bazeia-ba gastu ne’ebé iha”.

Tuir observasaun husi Diresaun Edukasaun Munisipál nian, iha kompaña balun fornese ai han la tuir menú programa Merenda Eskolár nian no iha duni failansu balu, presija kompaña sira, halo kordenasaun ida diak ho Diretór Eskola hare mós matadan kona-ba menu nian, tenik Diretora Edukasaun Munisipál.

Líder Máximu Autoridade Munisipál ne’e, akresenta tan katak; “Iha sorumutu ne’e, Autoridade Munisipál la-hasai disijaun ruma, kompañia balun hakarak atu akompaña lai-nia prosesu, autoridade Munisipál konsidera no ba komapaña sira ne’ebé mak hakarak kontinua fornese ai-han, Autoridade Munisipál, husu atu hadia failansu sira ne’ebé iha atu bele implementa programa merenda eskolar iha Manufahi lao tuir matadalan, hodi tulun no hasa’e estudante sira nia koiñesimentu (kapasidade) liu-husi konsumu ai-han ne’ebé nakonu ho nutrisaun”.

Portantu, Kompañia Lokál ne’ebé mak partisipa iha sorumutu ne’e mak hanesan; Fergo Unip.Lda, Kristela Macela Unip.Lda, Haet Haha Unip. Lda, Bomer Unip.Lda. no Hulmo Unip.Lda.

“𝑴𝒆𝒅𝒊𝒂 𝑷𝑨𝑴 𝑴𝒂𝒏𝒖𝒇𝒂𝒉𝒊”