Salaun KABLAKI, 05 Fevereiru 2026
Prezidenti Komisaun A Parlamentu Nasionál ne’ebé mak trata Asuntu Konstitusionál no Justisa, Distintu Deputadu Natalino dos Santos Nascimento ho membru komisaun halo enkontru ho Autoridade Munisipál Manufahi iha Salaun Kablaki.
Iha enkontru ne’e, Prezidenti Autoridade Munisipál, Luis Marçal da Costa Tavares, akompaña husi Sekretáriu Munisipál Asuntu Administrasaun no Finansas, Sekretáriu Munisipál Asuntu Sosiál no Oeganizasaun Komunitária, Diretora Diretora Rejistu Sivil, Diretora Rejistu Notariadu Servisu Kadastrais Munisipál, Diretór STAE, Diretór Ajénsia Fiskalizasaun, Diretór Servisu Munisipál Apoiu ONG no Organizasaun Komunitáriu, rona preokupasaun membrus komisaun nian kona-bá prontidaun Autoridade Munisipál nian hodi simu podér lokál, liu-liu iha área rekursu umanu, rekursu finanseiru, lejislasaun no rekrsu naturais (área potensialidade ne’ebé iha).
Iha enkontru ne’e, membrus komisaun sira halo fiskalizasaun hare liu-ba preparasaun Munisípiu Manufahi nian ba simu Poder Lokál ne’ebé ninia avaliasaun kondisaun minima fó sai husi Ministériu Administrasaun Estatál ba Munisípiu lima mak hetan “Muito Bom” inkluindu Manufahi. Portantu, Exelénsia Prezidenti Autoridade Munisípiu Manufahi hateten; Manufahi prontu 100% simu Poder Lokál.
Podér lokál ninia sentidu, iha ami nia VONTADE no KOMPROMIXU; Hametin unidade, estabilidade hodi serví povu ho diak.
Autoridade Munisipál ho nia diresaun hamutuk 20 hala’o hela ezersísiu no prepara hela kondisaun sira, hodi hakat ba poder lokál. Munisípiu nia problema bo’ot liu mak Orsamentu no planu sira hetan aprovasaun husi Konsellu Konsultivu Munisipál iha faze diskusaun no ba iha Komisaun Ratifikasaun Orsamentu hetan korte ho rajaun sira ne’ebé nesesáriu.
Líder máximu Autoridade Munisípiu ne’e, haktuir tan; “Servisu ne’ebé Autoridade halo prinsipál hodi simu poder Lokál mak konsolida Manufahi oan sira, Lider Partidu Politiku hotu, Organzasaun rejisténsia sira, Veteranu, líder relijioza sira ho hanoin ida deit kria estabilidade no unidade, atu nune’e povu ne’e bele moris hakmatek, hodi hein Governu Sentrál atribui poder lokál mai Manufahi, hodi lori administrasaun habesik aan liu-ba komunidade, hadia povu ne’e nia moris konkretiza mehi avo bei ala sira nian, ba ukun rasik-aan”.
“Media PAM”
